ធនាគារ Barclays បានអះអាងថា ខ្លួននឹងកាត់បន្ថយបុគ្គលិក ១៩ ០០០នាក់ចាប់ពីឆ្នាំនេះដល់ឆ្នាំ២០១៦ ក្នុងនោះជាង ៩ ០០០នាក់ នៅចក្រភពអង់គ្លេស។ នេះជាយុទ្ធសាស្ត្រថ្មីរបស់ធនាគារ បន្ទាប់ពីការវិនិយោគទទួលផលមិនគាប់ប្រសើរក្នុងពេលកន្លងទៅ នេះ។
ការប្រកាសលើកនេះ គឺចំនួនកាត់បន្ថយបុគ្គលិកច្រើនជាងការអះអាងកាលពីដើម ឆ្នាំដែលថាកាន់បន្ថយប្រមាណពី ១០ ០០០ ទៅ១២ ០០០ កន្លែងប៉ុណ្ណោះ។
ធនាគារវិនិយោគរងគ្រោះដោយសារតែ ការធ្លាក់ចុះតម្រូវការកម្ចីពី រដ្ឋាភិបាល និងក្រុមហ៊ុននានា។ សាខារបស់ធនាគារនេះ នៅប្រទេសមួយចំនួនក្នុងតំបន់អឺរ៉ុបដូចជា អេស្ប៉ាញ ព័រទុយហ្គាល់ អ៊ីតាលី និងបារាំង នឹងមានការផ្លាស់ប្ដូរ។
លោក Antony Jenkins នាយកប្រតិបត្តិធនាគារនេះ បានថ្លែងថា ៖«នេះជាការធ្វើឲ្យធនាគារ Barclays ក្លាយជាធម្មតាមួយ។ យើងនឹងធ្វើជាធនាគារផ្ដោតតែទៅលើអន្តរជាតិដោយបើកដំណើរការនៅ តាមតំបន់មួយចំនួនដែលយើងមានសមត្ថភាព និងឧត្ដមភាពប្រកួតប្រជែងតែប៉ុណ្ណោះ»។
ផ្នែកធនាគារវិនិយោគដែលមានបុគ្គលិកសរុប ២៦ ០០០ នាក់ បុគ្គលិកចំនួន ២០០០កន្លែងនឹងត្រូវកាត់បន្ថយនៅឆ្នាំនេះ ដោយ ៥ ០០០នាក់ទៀតនឹងត្រូវកាត់បន្ថយនៅត្រឹមឆ្នាំ២០១៦។ បើគិតសរុបនៅឆ្នាំ២០១៤នេះ ធនាគារនឹងកាត់បន្ថយបុគ្គលិកប្រមាណ ១៤ ០០០កន្លែង។
នៅត្រីមាសដំបូងឆ្នាំនេះ ពាណិជ្ជកម្មលើវិស័យធនាគារវិនិយោគទទួលរងគ្រោះយ៉ាងខ្លាំង ប្រាក់ចំណូលធ្លាក់ចុះប្រមាណ ២៨%។
ប្រាក់ចំណូលបានមកពីការដោះដូររូបិយប័ណ្ណ សញ្ញាប័ណ្ណ និងប្រភពចំណូលផ្សេងៗទៀត បានធ្លាក់ចុះ ៤១%ដល់ ១,២៣ពាន់លានផោន ដែលស្មើនឹងជាង ២ពាន់លានដុល្លារ។
Barclays ជាធនាគារពហុជាតិសាសន៍ដ៏ធំរបស់ប្រទេសអង់គ្លេសបង្កើតឡើងតាំងពី ឆ្នាំ១៦៩០។ បច្ចុប្បន្នធនាគារនេះមានសាខានៅច្រើនប្រទេសជុំវិញពិភពលោក៕
ប្រែសម្រួល៖ ប៉ិច ស៊ីនួន
ប្រភព៖ BBC
Post a Comment