ក្រុមហ៊ុនផលិតកុំព្យូទ័ររបស់តៃវ៉ាន់ Acer បានបញ្ជាក់កាលពីថ្ងៃព្រហស្បតិ៍ថា ខ្លួនបានទទួលចំណេញវិញហើយនៅត្រីមាសទី១ គិតត្រឹមខែមីនាកន្លងទៅ ដោយបញ្ចប់ការខាតបង់រយៈពេលបីត្រីមាសជាប់ៗគ្នា។ ប្រាក់ចំណេញនេះ គឺទទួលបានដោយសារតែ ក្រុមហ៊ុនគ្រប់គ្រងថ្លៃ និងសន្និធិបានល្អ។
ក្រុមហ៊ុន Acer បានបង្ហាញប្រាក់ចំណេញសុទ្ធប្រមាណ ១លានដុល្លារតៃវ៉ាន់ (ប្រហែល ៣៤ ០០០ដុល្លារ) នៅត្រីមាសដំបូងនៃឆ្នាំ២០១៤ នេះដែលប្រសើរជាងត្រីមាសទី៤ នៃឆ្នាំ២០១៣ គឺខាតប្រហែលជាង ៧,៦៣ពាន់លានដុល្លារតៃវ៉ាន់ (ប្រហែល ២៥០លានដុល្លារ) ក៏ប៉ុន្តែប្រាក់ចំណេញសុទ្ធឆ្នាំនេះនៅចាញ់ត្រីមាសដូចគ្នាកាល ពីឆ្នាំ២០១៣ គឺមានចំនួនជាង ១៧លានដុល្លារ។
ក្រុមហ៊ុនបានបញ្ជាក់នៅក្នុងរបាយការណ៍ថា ប្រាក់ចំណូលសរុបបានធ្លាក់ចុះ ១១,៤%នៅត្រីមាសដូចគ្នាកាលពីឆ្នាំ២០១៣ និងធ្លាក់ចុះ ១៦,៦%នៅទូទាំងឆ្នាំ២០១៣ ដល់ចំនួន ៧៦,៧២ពាន់លានដុល្លារតៃវ៉ាន់ ខណៈចំណូលប្រតិបត្តិការនៅត្រីមាសឆ្នាំ២០១៤ នេះបានកើនដល់ជាង ៤លានដុល្លារដោយសារការគ្រប់គ្រងសន្និធិបានល្អ និងចំណាយមានប្រសិទ្ធភាព។ កត្តានេះបានធ្វើឲ្យប្រាក់ចំណេញដុលនិងកត្តាផ្សេងទៀតមាន ស្ថិរភាព។
កាលពីខែធ្នូ ឆ្នាំ២០១៣ លោក Shin បានផ្ទេរតំណែងជានាយកប្រតិបត្តិ និងប្រធានក្រុមហ៊ុនទៅឲ្យលោក Jason Chen ជាអតីតមន្ត្រីប្រតិបត្តិទីផ្សារនៅក្រុមហ៊ុនផលិតបន្ទះមីក្រូឈីប ឈានមុខគេឈ្មោះ Taiwan Semiconductor Manufacturing Co.។
លោកគ្រោងឈប់ធ្វើជាប្រធាននៅថ្ងៃទី១៨ ខែមិថុនា ចំថ្ងៃដែលក្រុមម្ចាស់ភាគហ៊ុនជួបប្រជុំគ្នា និងជាពេលត្រូវជ្រើសរើសអ្នកបន្តវេនពីលោកផងដែរ៕
ប្រែសម្រួល៖ ប៉ិច ស៊ីនួន
ប្រភព៖ channel news asia
Post a Comment