នៅលើពិភពលោកនេះ មានធនាគារធំៗជាច្រើន
ពោលគឺមិនតិចជាង១០០នោះទេ។ ថ្ងៃនេះបណ្ដាញព័ត៌មាន
thebnews.com
សូមបង្ហាញធនាគារមួយចំនួនដើម្បីឱ្យប្រិយមិត្តបានស្គាល់ថាតើ
ធនាគារនីមួយៗមានទ្រព្យសកម្មសរុបចំនួនប៉ុន្មាន។
អ្វីដែលគួរឱ្យកត់សម្គាល់នាពេលនេះ
ធនាគាររបស់ចិនគឺស្ថិតនៅលើតារាង
ខណៈដែរធនាគារអាមេរិកមិនស្ថិតនៅក្នុងចំណោមធនាគារកំពូលទាំង ៥
នោះទេ។
បើយោងតាមរបាយការណ៍ដែលចេញផ្សាយដោយក្រុមហ៊ុនហិរញ្ញវត្ថុ SNL Financial បានឲ្យដឹងថា ធនាគារធំជាងគេបំផុតនៅក្នុងពិភពលោកនេះគឺ ធនាគារឧស្សាហកម្ម និងធនាគារពាណិជ្ជចិន (Industrial and Commercial Bank of China) ដែលមានទ្រព្យសកម្ម (Asset) ចំនួន ៣ ០៦២ ពាន់ពាន់លានដុល្លារ។
ធនាគារទីពីរគឺធនាគារ HSBC របស់ចក្រភពអង់គ្លេសដែលមានទ្រព្រសកម្មចំនួន ២ ៧២៣ ពាន់ពាន់លានដុល្លារ ហើយបន្ទាប់មកទៀតគឺធនាគារ Credit Agricole របស់បារាំងជាប់ចំណាត់ថ្នាក់លេខបី មានទ្រព្យសកម្មចំនួន ២ ៦១៥ ពាន់ពាន់លានដុល្លារ។
ជាការពិតគិតត្រឹមដើមឆ្នាំ២០១៤ នេះ គ្មានធនាគារអាមេរិកណាមួយបានជាប់ចំណាត់កំពូលទាំង១០ នៅក្នុងបញ្ជីនេះទេ ប៉ុន្តែកាលពីឆ្នាំ២០១៣ គឺមានធនាគារអាមេរិកមួយជាប់ចំណាត់ថ្នាក់ទី៦នៅក្នុងពិភពលោកគឺ ធនាគារ JPMorgan Chase ដែលមានទ្រព្យសកម្មសរុប ២ ៤៦៣ ពាន់ពាន់លានដុល្លារ។
បើតាមការដាក់ចំណាត់ថ្នាក់របស់ SNL បានបង្ហាញថា ចិនមានធនាគារធំៗជាច្រើនក្នុងនោះមានធនាគារជាប់ចំណាត់ថ្នាក់ កំពូលចំនួន ១៤ក្នុងចំណោមធនាគារចំនួន១០០ ដែលមានទីស្នាក់ការនៅក្នុងប្រទេសនេះ។ បន្ទាប់មកទៀតគឺអាមេរិកដែលមានធនាគារជាប់ចំណាត់ថ្នាក់កំពូល ១០ក្នុងចំណោម១០០។
ការផ្ដល់ចំណាត់ថ្នាក់នេះគឺធ្វើឡើងដោយផ្អែកទៅលើទ្រព្យ សកម្មរបស់ធនាគារនីមួយៗ។ ធនាគារនៅក្នុងពិភពលោកភាគច្រើនទាំងនៅសហភាពអឺរ៉ុប និងចិនដែរនោះ បានប្រើប្រព័ន្ធមួយដែលបានបង្ហាញពីបទដ្ឋានរាយការណ៍ហិរញ្ញ វត្ថុអន្តរជាតិដែលគេឱ្យឈ្មោះថាប្រព័ន្ធ IFRS ។ ដូចគ្នានេះដែរ អាមេរិកប្រើគោលការណ៍គណនីដែលអាចទទួលយកបានជាទូទៅ ឬក៏ប្រព័ន្ធ GAAP ទេ។
ភាពខុសប្លែកគ្នាមានច្រើននៅពេលនិយាយពីការវាយតម្លៃ និងរាប់ទ្រព្យសកម្មរបស់ធនាគារ។ ជាការពិត បើធនាគារអាមេរិកត្រូវប្រើប្រព័ន្ធ IFRS មែន ធនាគារ JPM និងធនាគាររបស់អាមេរិកមួយទៀតនឹងមានចំណាត់ថ្នាក់លេខមួយ និងលេខពីរតាមលំដាប់លំដោយ។ ធនាគារ Citigroup ដែលឥឡូវនេះឈរនៅចំណាត់ថ្នាក់ទី១៤ និងមានទ្រព្យសកម្មចំនួន ១ ៨៩៩ ពាន់ពាន់លានដុល្លារ នោះនឹងក្លាយជាធនាគារធំបំផុតទី៥ក្នុងពិភពលោកមិនខានឡើយ៕
ប្រែសម្រួល៖ ប៉ិច ស៊ីនួន
កែសម្រួល៖ ឆ្មាខ្មៅ
ប្រភព៖ forbes
Post a Comment