ទំហំពាណិជ្ជកម្មទ្វេភាគីរវាងប្រទេសកម្ពុជា និងសហរដ្ឋអាមេរិកបានកើនឡើងដល់ ៨៤៥លានដុល្លារអាមេរិកនៅត្រីមាសដំបូងនៃឆ្នាំ២០១៤នេះ។
ចំនួននេះបានកើនឡើង ១១% ពី ៧៥៨លានដុល្លារបើធៀបនឹងរយៈពេលដូចគ្នាកាលពីឆ្នាំមុន។ តួលេខនេះត្រូវបានចេញផ្សាយដោយក្រសួងពាណិជ្ជកម្មសហរដ្ឋ អាមេរិកកាលពីថ្ងៃពុធកន្លងទៅ។
សហរដ្ឋអាមេរិកជាទីផ្សារនាំចេញធំបំផុតទីពីររបស់កម្ពុជាបន្ទាប់ ពីសហភាពអឺរ៉ុប។ ពីខែមករា ដល់ខែមីនា នៅឆ្នាំនេះ ការនាំចេញរបស់កម្ពុជាទៅសហរដ្ឋអាមេរិកមានតម្លៃ ៧៧១លានដុល្លារកើនឡើង១១%បើធៀបរយៈពេលដូចគ្នាកាលពីមួយឆ្នាំ មុន។
ទន្ទឹមនេះដែរ ការនាំចូលរបស់ប្រទេសកម្ពុជាពីសហរដ្ឋអាមេរិកមានចំនួន ៧៤លានដុល្លារគឺកើន១៧%។ ផលិតផលសំខាន់ៗដែលកម្ពុជាបាននាំចេញទៅសហរដ្ឋអាមេរិកមានសំលៀក បំពាក់ និងស្បែកជើង។ រីឯកម្ពុជាវិញបាននាំចូលរថយន្ត គ្រឿងម៉ាស៊ីន បរិក្ខារ និងថ្នាំពេទ្យជាដើម។
អ្នកនាំពាក្យក្រសួងពាណិជ្ជកម្មកម្ពុជាលោក កឹម រដ្ឋា បានថ្លែងថា ការកើនឡើងនូវពាណិជ្ជកម្មទ្វេភាគីនេះគឺដោយសារតែប្រទេសទាំងពីរ មានទំនាក់ទំនង និងកិច្ចសហប្រតិបត្តិការល្អ។ កាលពីឆ្នាំ២០១៣ ទំហំពាណិជ្ជកម្មរវាងប្រទេសទាំងពីរ មានតម្លៃ ៣,០១ពាន់លានដុល្លារគឺកើន ៣%បើធៀបនឹងឆ្នាំ២០១២៕
ដោយ៖ ប៉ិច ស៊ីនួន
Post a Comment