មិនមែនមានតែយន្តហោះ ឬរថយន្តនោះទេ
ដែលធ្លាប់មានករណីគ្រោះថ្នាក់ទ្រង់ទ្រាយធំ
សូម្បីតែសាឡាងក៏ធ្លាប់មានករណីលិច
និងបណ្ដាលឱ្យមានមនុស្សស្លាប់ជាច្រើននាក់ដែរ។ ជាក់ស្ដែង
កាលពីពេលថ្មីៗនេះ
ការលិចសាឡាងដឹកអ្នកដំណើរភាគច្រើនជាសិស្សសាលានៅកូរ៉េខាង
ត្បូង ត្រូវបានគេអះអាងថា មានអ្នកស្លាប់មិនតិចជាង
២០០នាក់នោះទេ។ ខាងក្រោមនេះ thebnews បានដកស្រង់សេចក្ដីរាយការណ៍របស់កាសែត AP, AFP និងWorld Almanacអំពីគ្រោះថ្នាក់តាមស្រឡាងចំនួន១០ដែលមានអ្នកស្លាប់ច្រើន ជាងគេបំផុតនៅក្នុងពិភពលោក៖
ឆ្នាំ១៩៨៧៖ ស្រឡាង Dona Paz បានបុកគ្នាជាមួយនឹងនាវាដឹកប្រេង Vector កាលពីថ្ងៃទី២០ ខែធ្នូនៅប្រទេសហ្វីលីពីនបណ្ដាលមានការឆាបឆេះ និងលិចស្លាប់មនុស្ស ៤ ៣៤១ នៅក្នុងគ្រោះថ្នាក់តាមដែនសមុទ្រដ៏អាក្រក់បំផុតក្នុងពិភពលោក។
ឆ្នាំ២០០២៖ ស្រឡាង Le Joola ដែលផ្ទុកចំនួនលើសចំណុះបានក្រឡាប់លិចកាលពីថ្ងៃទី២៦ ខែកញ្ញា នៅប្រទេសសេណេហ្គាល់ ដោយស្លាប់មនុស្សប្រមាណ ១ ៨៦៣ នាក់។
ឆ្នាំ១៩៥៤៖ ស្រឡាង Toya Maru បានលិចកាលពីថ្ងៃទី២៦ ខែកញ្ញា នៅជិតប្រទេសជប៉ុននៅក្នុងពេលមានព្យុះទីហ្វុងដោយអ្នកដំណើរ និងសមាជិកនាវិកជាង ១ ០០០នាក់បានស្លាប់។
ឆ្នាំ២០០៦៖ ស្រឡាង Al Salaam Boccaccio 98 បានលិចកាលពីថ្ងៃទី៣ ខែកុម្ភៈ នៅសមុទ្រក្រហមដោយមានអ្នកស្លាប់ជាង ១ ០០០នាក់។
ឆ្នាំ១៩៩៦៖ ស្រឡាង Bukoba បានបើកបុកនឹងដុំថ្ម ហើយបានក្រឡាប់កាលពីថ្ងៃទី២១ ខែឧសភានៅក្នុងបឹង Lake Victoria នៅប្រទេសតង់ហ្សានី ស្លាប់មនុស្សនៅលើកប៉ាល់នេះរហូតដល់១០០០នាក់ ហើយកប៉ាល់នោះត្រូវបានគេបញ្ជាក់ថា អាចដឹកមនុស្សបានតែ ៤៣០ ប៉ុណ្ណោះ។
ឆ្នាំ២០០៨៖ ស្រឡាង Princess of the Stars បានក្រឡាប់លិចកាលពីថ្ងៃទី២១ ខែមិថុនា នៅក្នុងគ្រោះថ្នាក់ព្យុះទីហ្វុងនៅជិតប្រទេសហ្វីលីពីន ស្លាប់មនុស្សប្រហែល៧០០នាក់។
ឆ្នាំ១៩៨៦៖ ស្រឡាង Shamia បានក្រឡាប់លិចកាលពីថ្ងៃទី២៧ ខែឧសភា នៅក្នុងឧបទ្ទវហេតុព្យុះនៅក្នុងទន្លេនៅប្រទេសបង់ក្លាដេស ស្លាប់មនុស្សប្រមាណ៥០០នាក់។
ឆ្នាំ២០០៣៖ ស្រឡាង Nazreen-1 បានលិចកាលពីថ្ងៃទី៨ ខែកក្កដានៅទន្លេរបស់ប្រទេសបង់ក្លាដេសដោយស្លាប់មនុស្សប្រហែល៥០០នាក់។
ឆ្នាំ១៩៩៣៖ ស្រឡាង Neptune បានលិចកាលពីថ្ងៃទី១៦ខែកុម្ភៈនៅប្រទេសហៃទី សម្លាប់មនុស្សយ៉ាងតិច ៥០០នាក់។
ឆ្នាំ២០០០៖ ស្រឡាង Cahya Bahari បានលិចកាលពីថ្ងៃទី ២៩ខែមិថុនានៅក្នុងឧបទ្ទវហេតុព្យុះនៅជិតប្រទេសឥណ្ឌូណេស៊ី ស្លាប់មនុស្សជិត ៥០០នាក់៕
ប្រែសម្រួល៖ ប៉ិច ស៊ីនួន
Post a Comment