១) តើអ្វីទៅ G7?
G7 ឬ Group of 7 គឺសំដៅលើក្រុមប្រទេសចំនួន៧ដែលជាមហាអំណាចសេដ្ឋកិច្ចជឿនលឿន និង ខ្លាំងក្លាជាងគេបំផុតនៅលើពិភពលោក។ បង្កើតឡើងតាំងពីឆ្នាំ ១៩៧៥ គេក៏អាចហៅម្យ៉ាងទៀតថា ជាក្រុមប្រទេសអភិវឌ្ឍមានជាងគេបំផុតនៅលើពិភពលោកផងដែរ។
២) តើប្រទេសណាខ្លះជាសមាជិក G7?
ប្រទេសជាសមាជិក G7 រួមមាន អាមេរិក បារាំង កាណាដា អាល្លឺម៉ង់ អ៊ីតាលី ជប៉ុន និង អង់គ្លេស ។
៣) តើអ្វីទៅជាមុខងារសំខាន់របស់ក្រុមប្រទេស G7?
ការបង្កើតក្រុមប្រទេស G7 ជាលើកដំបូង គឺដើម្បីជួយសម្រួលឲ្យមានគំនិតផ្ដួចផ្ដើមចែករំលែកគោលនយោបាយ ម៉ាក្រូសេដ្ឋកិច្ចក្នុងចំណោមប្រទេសជាសមាជិកក្នុងការឆ្លើយតបទៅ នឹងការដួលរលំនៃអត្រាប្ដូរប្រាក់នៅក្នុងឆ្នាំ ១៩៧១ (Nixon Shock) និង វិបត្តិសេដ្ឋកិច្ចក្នុងកំឡុងពេលនោះ។
G7 មានមុខងារក្នុងការសម្របកែតម្រូវសេដ្ឋកិច្ចក្នុងរយៈពេលខ្លី ក្នុងចំណោមប្រទេសជាសមាជិក ដើម្បីជំរុញឲ្យមានការអភិវឌ្ឍសេដ្ឋកិច្ចសាកលលោក និង វាយតម្លៃគោលនយោបាយសេដ្ឋកិច្ច។
G7 ក៏មានតួនាទីផងដែរក្នុងការដោះស្រាយបញ្ហាវិបត្តិសេដ្ឋកិច្ច បញ្ហាហិរញ្ញវត្ថុ និង បញ្ហាផ្សេងៗជាច្រើនទៀតដែលមាននៅក្នុងចំណោមបណ្តាប្រទេស ឧស្សាហកម្មជឿនលឿនមកពីជុំវិញពិភពលោក។
៤) តើសេដ្ឋកិច្ចរបស់ក្រុមប្រទេស G7 មានទំហំប៉ុន្មាន?
យោងតាមរបាយការណ៍ Credit Suisse Global Wealth Report បានវាយតម្លៃថា ទំហំសេដ្ឋកិច្ចរបស់ក្រុមប្រទេស G7 មានចំនួនស្មើនឹង ៦៤% នៃទំហំសេដ្ឋកិច្ចពិភពលោក ឬ ស្មើនឹង ២៦៤ ពាន់ពាន់លានដុល្លារ។
៥) តើក្រុមប្រទេស G7 មានប្រជាជនប៉ុន្មានលាននាក់?
គិតមកដល់ឆ្នាំ ២០១៤ នេះ ក្រុមប្រទេស G7 មានប្រជាជនជាង ៧៥០ លាននាក់ហើយ។
៦) តើសមាជិក G7 និង G8 ខុសគ្នាដូចម្តេចទៅ?
តាមពិតទៅក្រុមប្រទេស G8 គឺកើតចេញមកពីប្រទេស G7 បូកនឹងប្រទេសរុស្ស៊ីមួយទៀតដែលបានចូលជាសមាជិកនៅក្នុងឆ្នាំ ១៩៩៨ បង្កើតបានជាង G8។ ប៉ុន្តែ កៅអីរបស់រុស្ស៊ីត្រូវបានបោះឆ្នោតព្យួរជាបណ្ដោះអាសន្នដោយសមាជិក G7 នៅថ្ងៃទី ២៤ មិនា ឆ្នាំ ២០១៤ កន្លងទៅនេះក្រោយរដ្ឋាភិបាលលោកពូទីនចូលកាន់កាប់តំបន់ Crimea របស់អ៊ុយក្រែន៕
ប្រែសម្រួល៖ ខេវិន
ប្រភព៖ investopedia & dailymail& wikipedia
Post a Comment