ជាមួយកំណើនសេដ្ឋកិច្ចលូតលាស់យ៉ាងឆាប់រហ័សក្នុងរយៈពេល៣ ទសវត្សចាប់តាំងពីមានកំណែទម្រង់ស៊ីជម្រៅរបស់ខ្លួនក្នុងទសវត្សទី ៨០មក បានធ្វើឲ្យធនាគារពិភពលោក (World Bank)ហ៊ានអះអាងថា ចិនអាចក្លាយជាមហាអំណាចសេដ្ឋកិច្ចទី១នៅលើពិភពលោកនៅក្នុងឆ្នាំ ២០១៤នេះ។
យោងតាមរបាយការណ៍កម្មវិធីប្រៀបធៀបអន្តរជាតិនៃធនាគារពិភពលោកដែលហៅ ថា (International Comparison Program of the World Bank) បានឲ្យដឹងថា សេដ្ឋកិច្ចលូតលាស់យ៉ាងឆាប់រហ័សរបស់ចិនមានលក្ខណៈលឿនជាងការ រំពឹងទុករបស់អ្នកវិភាគជាច្រើនទៀតនៅជុំវិញពិភពលោក ដែលទស្សន៍ទាយថា ចិនមិនអាចក្លាយជាមហាអំណាចសេដ្ឋកិច្ចទី១នៅពេលឆាប់ៗខាងមុខ នេះបានឡើយ។
កំណើនផលិតផលក្នុងស្រុកសរុប (GDP)
ផ្អែកលើអំណះអំណាងខាងលើ របាយការណ៍នេះបានបញ្ជាក់ថា កំណើនផលិតផលក្នុងស្រុកសរុបរបស់ចិន (GDP) បានកើនឡើងដល់ ១៣,៥ពាន់ពាន់លានដុល្លារកាលពីឆ្នាំ២០១១ ខណៈការប្រៀបធៀបអត្រាប្ដូរប្រាក់មានចំនួន ៧,៣ពាន់ពាន់លានដុល្លារ ប្រកៀកប្រកើយនឹងអាមេរិកដែលមានកំណើនGDP សរុប ១៥,៥ពាន់ពាន់លានដុល្លារ។ តួលេខនេះបញ្ជាក់ថា សេដ្ឋកិច្ចចិនហក់ឡើងហួសអាមេរិកនៅក្នុងឆ្នាំនេះ។
មហិច្ឆតារបស់មហាយក្សចិន
សម្រាប់មហាយក្សចិន មហិច្ឆតារបស់ខ្លួននៅពេលនេះក៏ដូចជាពេលអនាគតគឺធ្វើយ៉ាងម៉េច ដណ្ដើមឲ្យបានតំណែងអាមេរិកជាមហាអំណាចសេដ្ឋកិច្ចទី១នៅលើលោកក្នុង សតវត្សទី២១នេះ គឺឲ្យបានកាន់តែឆាប់កាន់តែល្អ។ សេដ្ឋកិច្ចខ្លាំង មានលុយច្រើនមានន័យថា ចិនអាចធ្វើឲ្យពិភពលោករណបខ្លួន និងចង់បង្ហាញថា របបកុម្មុយនិស្តពិតជាអាចយកឈ្នះរបបមូលធននិយមតាមបែប ប្រជាធិបតេយ្យរបស់លោកខាងលិច ដែលបានបំបាក់ខ្លួនអស់រយៈពេល២០០ឆ្នាំមកនេះ។
តែចិនធំតែមាឌចង្អៀតតែមុង
នៅសតវត្សទី២១នេះ គេដាច់ខាតមិនត្រូវភ្លេចសម្លឹងមើលទៅទិសបូព៌ារបស់មហាយក្សចិន ជាមួយកំណើនប្រជាជនបច្ចុប្បន្ន ១,៤ពាន់លាននាក់នឹងអាចដណ្ដើមតំណែងអាមេរិកបាន។ ទោះបីជាបែបនេះក្ដី យក្សអាស៊ីមួយនេះមិនត្រូវមោទនភាពខ្លួនឯងជ្រុលពេកទេ ត្បិតអីខ្លួននៅមានការងារធ្វើជាច្រើនទៀតដើម្បីផលិតថ្នាំយ៉ាង ពិសេសសម្រាប់ពង្រីក និងពង្រឹងសេដ្ឋកិច្ចរបស់ខ្លួនឲ្យឈរជើងបានយូរនាពេលអនាគត។
ភាពផុយស្រួយផ្នែកសេដ្ឋកិច្ច ដូចជាការវិនិយោគហួសពីតម្រូវការ លំហូរគម្រោងសំណង់អចលនទ្រព្យជាមួយនឹងប្រាក់បំណុលខ្ពស់ បច្ចេកវិទ្យានៅទាប កង្វះធនធានមនុស្ស និងអ្នកជំនាញលើផ្នែកហិរញ្ញវត្ថុ ការប្រយុទ្ធប្រឆាំងនឹងភាពក្រីក្រ គ្រោះធម្មជាតិ ទាំងនេះគឺជាហានិភ័យដ៏ធំជាស្រមោលអន្ទោលតាមប្រាណរបស់ទីក្រុង ប៉េកាំង។
អ្វីជាពិសេសនិងជាក្បាលម៉ាស៊ីនដ៏សំខាន់មួយទៀតសម្រាប់ការ អភិវឌ្ឍសេដ្ឋកិច្ចខ្លួននោះ គឺការកំណែទម្រង់ស៊ីជម្រៅនៅក្នុងជួររដ្ឋាភិបាលចិនក្នុងអាណត្តិ ប្រធានាធិបតីថ្មីលោកXi Jinping។ទោះបីជាការកំណែទម្រង់នេះទទួលបានលទ្ធផលផ្លែផ្កាក៏ពិត មែន ប៉ុន្តែនេះត្រូវបានអ្នកសេដ្ឋកិច្ច និងអ្នកវិភាគជាច្រើនបានមើលឃើញថា នឹងប្រឈមមុខឧបសគ្គជាច្រើនដែលអាចធ្វើឲ្យសេដ្ឋកិច្ចរបស់ខ្លួនចុះ ខ្សោយអាក្រក់ជាងនេះ ឬជួបវិបត្តិហិរញ្ញវត្ថុនៅពេលអនាគតក៏ថាបាន។
សេដ្ឋកិច្ចអាមេរិកតូចជាងចិនតែខ្លឹម
ការពិតមិនអាចប្រកែកបានដែលជាសំនួរពិសេសចោទសួរនៅពេលនេះនោះគឺ ថា ហេតុអ្វីបានជាអាមេរិកក្លាយជាមហាអំណាចសេដ្ឋកិច្ចទី១នៅលើ លោកជាង១សតវត្សរួចមកហើយ? ទោះបីជាចិនអាចដណ្ដើមតំណែងអាមេរិកបានក៏ពិតមែន ចូរកុំភ្លេចថាអាមេរិកនៅតែអាចដឹកមុខចិននៅលើវិស័យមួយចំនួន ទៀត។ បច្ចេកវិទ្យាជឿនលឿន ដែលកំពុងឈានមុខនៅក្នុងវិស័យឧស្សាហកម្ម និងវិស័យផ្សេងៗទៀត ធនធានមនុស្សសំបូរបែបនៅតែជាវិស័យស្នួល និងអាទិភាពសម្រាប់ទីក្រុងវ៉ាស៊ីនតោន។
ងាកមកមើលវិស័យហិរញ្ញវត្ថុវិញ អាមេរិកនៅតែជាមជ្ឈមណ្ឌលហិរញ្ញវត្ថុធំជាងគេបំផុតនៅលើពិភពលោក ហើយអ្នកវិភាគបង្ហាញថា ប្រាក់ដុល្លារអាមេរិកនៅតែឈរលើកំពូលតារាងដដែលនៅពេលអនាគត។ ប៉ុន្តែនេះមិនមែនមានន័យថា អាមេរិកចប់បេសកកម្មរបស់ខ្លួនត្រឹមនេះនោះទេ ពោលគឺកំណែទម្រង់ប្រព័ន្ធហេដ្ឋារចនាសម្ព័ន្ធ ពន្ធដារ វិស័យអប់រំ និងយន្តការកាត់បន្ថយគំលាតរវាងអ្នកមាននិងអ្នកក្រ ត្រូវតែធ្វើឡើងដើម្បីភាពលូតលាស់សេដ្ឋកិច្ចរបស់ខ្លួន៕
ប្រែសម្រួលដោយ៖ K.vin Adana
ប្រភព៖ time.com
Post a Comment