The Khmer News Online

Saturday, January 10, 2015

ហាងឆេងមាស អត្រាប្ដូរប្រាក់ និងប្រេងឆៅ ថ្ងៃសៅ ទី១០ មករា (មាសឡើងថ្លៃ)

អំពីសន្ទស្សន៍តម្លៃមាស អត្រាប្ដូរប្រាក់ និងប្រេងឆៅ
ប្រេងឆៅ មួយបារ៉ែល (១៥៩ លីត្រ) = ៤៨,៣៦ (ហាងឆេង West Texas នៅសហរដ្ឋអាមេរិក) – ៥០,១១ ដុល្លារ (ហាងឆេង Brent នៅអឺរ៉ុប)
មាស ៨ជី ៣ហ៊ុន = ១២១៦,១ ដុល្លារ ដុល្លារ (១ដំឡឹង = ១៤៦៥,១៨ ដុល្លារអាមេរិក) (តាមហាងឆេង Comex នៅសហរដ្ឋអាមេរិក)
វៀតណាម ៖ មាស ៨ជី ៣ហ៊ុន = ១២២២,៨ ដុល្លារ (មួយដំឡឹង = ដុល្លារអាមេរិក)
ថៃ ៖ មាស ៨ជី ៣ហ៊ុន = ១២២៣,៤ ដុល្លារ (មួយដំឡឹង = ១៤៧៣,៩៧ ដុល្លារអាមេរិក)
ឥណ្ឌូណេស៊ី ៖ មាស ៨ជី ៣ហ៊ុន = ១២២២,៥១ ដុល្លារ (មួយដំឡឹង = ១៤៧២,៩ ដុល្លារអាមេរិក)

អំពីសន្ទស្សន៍អត្រាប្ដូរប្រាក់តាមទីផ្សារអន្តរជាតិ ថ្ងៃសៅ ទី១០ ខែមករា ឆ្នាំ២០១៥ (ម៉ោង ១១:២៥ ព្រឹកនៅព្រះរាជាណាចក្រកម្ពុជា)
មួយដុល្លារអាមេរិក = ៤០៧២ រៀលខ្មែរ (តាមអត្រាប្ដូរប្រាក់ផ្លូវការកំណត់ដោយធនាគារជាតិនៃកម្ពុជា ថ្ងៃសុក្រ ទី១០ ខែមករា ឆ្នាំ២០១៥)
មួយដុល្លារអាមេរិក = ៣២,៨៥ បាត (ថៃ)
មួយដុល្លារអាមេរិក = ២១ ៣៧០ ដុង (វៀតណាម)
មួយដុល្លារអាមេរិក = ០,៨៤៤៥ អឺរ៉ូ (១អឺរ៉ូ = ១,១៨៤២ ដុល្លារអាមេរិក)
មួយដុល្លារអាមេរិក = ១ ០៨៩,៦៨ វុន (កូរ៉េខាងត្បូង)
មួយដុល្លារអាមេរិក = ១,២១៨៩ ដុល្លារអូស្ត្រាលី
មួយដុល្លារអាមេរិក = ៧,៧៥៣១ ដុល្លារហុងកុង
មួយដុល្លារអាមេរិក = ១,១៨៦៧ ដុល្លារកាណាដា
មួយដុល្លារអាមេរិក = ១,៣៣៣៤ ដុល្លារសិង្ហបុរី
មួយដុល្លារអាមេរិក = ១១៨,៥ យ៉េន (ជប៉ុន)
មួយដុល្លារអាមេរិក = ៦,២០៨៧ យ័ន្ត (ចិន)

កំណត់សម្គាល់ : តួលេខខាងលើ ស្រង់ពីអត្រាលក់ចេញ និងប្ដូរប្រាក់តាមហាងឆេងអន្តរជាតិ គិតត្រឹមម៉ោង ១០:១៥ ព្រឹកថ្ងៃសៅ ទី១០ ខែមករា ឆ្នាំ២០១៥ ម៉ោងនៅព្រះរាជាណាចក្រកម្ពុជា។ ហាងឆេងនេះប្រែប្រួលគ្រប់វិនាទី អាស្រ័យលើចរន្តនយោបាយអន្តរជាតិ និងស្ថានភាពសេដ្ឋកិច្ចពិភពលោក៕

ដោយ៖ អន សំអាង

ប្រភព៖ nasdaq.com - marketwatch.com - bloomberg.com - Reuters.com

អ្នកជំនាញអចលនទ្រព្យ៖អ្នកវិនិយោគទុនគួរទិញដីទុកនៅតាមតំបន់នៅខេត្តមួយចំនួន ខណៈគម្រោងស្ថាបនាស្ពាននាឆ្នាំ២០១៥ ចាប់ផ្ដើមអភិវឌ្ឍន៍ជាបន្តបន្ទាប់

អ្នកជំនាញអចលនទ្រព្យលើកឡើងថា អ្នកវិនិយោគទុនគួរតែទិញដីទុកសម្រាប់ការវិនិយោគរបស់ខ្លួន ខណៈដែលគម្រោងកសាងស្ពានរបស់រាជរដ្ឋាភិបាលកម្ពុជាចំនួន ៦ ត្រូវបានកំណត់ការសាងសង់ចាប់ពីឆ្នាំ២០១៥ ដល់ ២០១៨ ដែលគ្រោងប្រគល់សិទ្ធិទៅឱ្យក្រុមហ៊ុនចិនជាអ្នកទទួលបន្ទុក សាងសង់។

នាយកក្រុមហ៊ុន Khmer Real Estate លោក គីម ហ៊ាង ឱ្យ TheBNEWS ដឹងនៅព្រឹកនេះថា ការតភ្ជាប់បណ្ដាញផ្លូវនិងស្ពានធ្វើដំណើរឆ្លងកាត់ពីខេត្ត មួយទៅខេត្តមួយទៀតវារឹតតែធ្វើឱ្យដីនៅតំបន់នោះមានតម្លៃកាន់ តែថ្លៃ ព្រោះវាផ្ដល់ភាពងាយស្រួលក្នុងការដឹកជញ្ជូនរបស់ក្រុមហ៊ុនផ្សេង ៗដែលទៅវិនិយោគនៅតំបន់នោះ ។

លោកមានប្រសាសន៍ថា៖«សម្រាប់អ្នកដែលមានលុយគួរតែទិញពីឥឡូវ បណ្ដើរទៅទម្រាំតែគាត់ធ្វើហើយ អាហ្នឹង យើងចំណេញលើគោកទៀតហើយ ស្ពានហ្នឹងជារឿងមួយដែលធ្វើឱ្យដីឡើងថ្លៃ ប្រសើរបើអ្នកវិនិយោគគេទិញទុកពីឥឡូវទៅ » ។

កាលពីពេលថ្មីៗនេះក្រសួងសាធារណការ និងក្រសួងសេដ្ឋកិច្ច បានឯកភាពគ្នាទៅលើគម្រោង អភិវឌ្ឍន៍ស្ពានឆ្លងកាត់ទន្លេចំនួន៦ បន្ថែមទៀតដោយការសាងសង់នឹងកំណត់ចាប់ផ្ដើមក្នុងឆ្នាំ ២០១៥ នេះរហូតដល់ឆ្នាំ ២០១៨ ។

ស្ពានឆ្លងកាត់ទន្លេទាំង ៦ ដែលរាជរដ្ឋាភិបាលគ្រោងនឹងធ្វើការសាងសង់នោះ រួមមានទី១ស្ពានភ្ជាប់ពីខេត្តក្រចេះទៅកាន់ទីប្រជុំជនកំពង់ថ្ម ខេត្តកំពង់ធំប្រវែង ១៦៥០ ម៉ែត្រ ទី២ គឺតភ្ជាប់ពីខេត្តត្បូងឃ្មុំ ទៅខេត្តកំពង់ចាមចម្ងាយជាង ១០០០ម៉ែត្រ ទី៣ស្ពានភ្ជាប់ពីខេត្តកំពង់ឆ្នាំងត្រង់ចំណុចកំពង់លែង ទៅខេត្តកំពង់ធំ ដែលមានចម្ងាយ ៣៨០០ម៉ែត្រ ។

គម្រោងទី៤ ស្ពានឆ្លងកាត់ទន្លេបាសាក់ ត្រង់ចំណុចស្រុកស្អាង ឆ្ពោះទៅត្រើយខាងកើត ទី៥ស្ពានឆ្លងទន្លេមេគង្គលើតភ្ជាប់ពីតំបន់ជ្រោយចង្វារ ឆ្ពោះទៅតំបន់ស្វាយជ្រុំ និងទី៦ស្ពានឆ្លងកាត់ទន្លេមេគង្គក្រោមចំណុចព្រែកឯង ឆ្ពោះទៅស្រុកល្វាឯមខេត្តកណ្តាល ដែលមានប្រវែងជាង ២០០០ម៉ែត្រ ។

ទាក់ទងទៅនឹងគម្រោងសាងសង់ស្ពាននៅតាមបណ្ដាខេត្តនេះ លោក គីម ហ៊ាង ក៏បានក្រើនរំលឹកទៅដល់អ្នកវិនិយោគគួរទិញដីនៅតាមទីប្រជុំ ។ លោកថ្លែងដូច្នេះថា ៖«ទំលាប់ប្រជាជនមិនថាខ្មែរទេគឺទាំង អាស៊ី មានតែអ្នកខេត្តចូលក្រុងមិនអាចអ្នកក្រុងទៅខេត្តទេ ដូច្នេះចម្ងាយដីពី២០ទៅ៣០គីឡូម៉ែត្រពីភ្នំពេញគួរសាកល្បង វិនិយោគ ចំណែកនៅតាមបណ្ដាខេត្តមានតែទីប្រជុំជនដែលមានរោងចក្រច្រើនទេ ដែលអាចធ្វើឱ្យដីឡើងថ្លៃបាន»។

សូមបញ្ជាក់ថានៅពេលគម្រោងសាងសង់ស្ពានឆ្លងកាត់ដៃទន្លេសាបដែល តភ្ជាប់ពីខេត្តកំពង់ឆ្នាំងទៅខេត្តកំពង់ធំ ទទួលបានជោគជ័យ ស្ពានដែលមានប្រវែង៣៨០០ម៉ែត្រនេះ នឹងក្លាយជាស្ពានវែងជាងគេបង្អស់នៅកម្ពុជា៕

អត្ថបទ ៖ ចាន់ សុខ នាង

លក្ខណៈពិសេស ១០ យ៉ាងដែលមហាយក្សចិនធ្វើបានល្អជាងប្រទេសណាៗទាំងអស់

១) សត្វជ្រូក
សត្វជ្រូក គឺជាសត្វពេញនិយមបំផុតសម្រាប់ចិញ្ចឹម និង សម្រាប់ធ្វើម្ហូបនៅក្នុងជីវភាពប្រចាំថ្ងៃរបស់ប្រជាជនចិន។ តាមប្រវត្តិសាស្ត្រ ការចិញ្ចឹមជ្រូកយកសាច់ កើតមានតាំងពី ៤ ៩០០ ឆ្នាំមុនគ្រិស្តសករាជមកម្ល៉េះ ហើយកាលពីឆ្នាំ ២០១២ កន្លងទៅនេះ គេបានរកឃើញថា ការផ្គត់ផ្គង់សាច់ជ្រូកនៅលើទីផ្សារក្នុងស្រុកចិន គឺមានប្រមាណ ៥២ លានតោន។

២) កីឡា
តាមពិតទៅ នៅពេលកន្លងមកចិនមិនមែនជាប្រទេសមួយដែលជោគជ័យខ្លាំងលើវិស័យ បាល់ទាត់ និង កីឡាផ្សេងៗទៀតដូចបណ្តាប្រទេសលោកខាងលិចនោះឡើយ។ ទោះបីជាបែបនេះក្តី រយៈពេលមួយទសវត្សចុងក្រោយនេះ ចិនបានខិតខំអភិវឌ្ឍវិស័យកីឡាកររបស់ខ្លួនដើម្បីឈានឆ្ពោះទៅកាន់ ម្ចាស់ពានរង្វាន់ព្រឹត្តិការណ៍កីឡាធំៗអន្តរជាតិ ដូចជា ព្រឹត្តិការណ៍កីឡាអូឡាំពិក និង ព្រឹត្តិការណ៍ World Cupជាដើម។ តួយ៉ាងព្រឹត្តិការណ៍កីឡាអូឡាំពិកឆ្នាំ ២០០៨ ដែលបានរៀបចំលើទឹកដីរបស់ខ្លួន កីឡាករចិនបានទទួលមេដាយមាសច្រើនជាងប្រជាជាតិណាៗទាំងអស់។

៣) ជំនឿ
ថ្វីត្បិតនៅពេលបច្ចុប្បន្ន ចិនកំពុងអភិវឌ្ឍខ្លួនក្លាយទៅជាមហាអំណាចមួយមានសេដ្ឋកិច្ចជឿនលឿន តែជំនឿតាមទំនៀមទម្លាប់ប្រពៃណី នៅតែចាក់ឫសគល់យ៉ាងជ្រៅក្នុងផ្នត់គំនិតប្រជាជនចិន។ ជំនឿលើសាសនា ហុងស៊ុយ លើករាសី ការរកស៊ី សង់ផ្ទះ ចូលឆ្នាំ ពិធីប្រពៃណីតូចធំរាប់មិនអស់ នៅតែកើតមានយ៉ាងព្រោងព្រាតមិនថា អ្នកក្រុង ឬ អ្នកស្រែនោះទេ។

៤) ឯកសារបុរាណ
ដូចមាននៅក្នុងភាពយន្ត ចិនសម័យបុរាណមានរាជវង្សសោយរាជ្យរាប់ពាន់ឆ្នាំមុនគ្រិស្តសករាជ ក្នុងការគ្រប់គ្រងលើទឹកដីដែលមានប្រជាជនយ៉ាងច្រើនមហិមានេះ។ លក្ខណៈពិសេសរបស់ប្រវត្តិសាស្ត្រចិនគឺថា ឯកសារសម័យបុរាណមានច្រើនជាងបណ្តាបណ្តាប្រទេសណាៗទាំងអស់ដែលបាន បន្សល់ទុករហូតមកដល់សព្វថ្ងៃនេះទាំងសំណេរលើសិលាចារឹក ទាំងសំណេរលើក្រដាសជាដើមដែលភាគច្រើនរៀបរៀបពីប្រវត្តិសាស្ត្រ ខ្លួន ក្បូនវិជ្ជាគុណ ក្បូនពេទ្យ យុទ្ធសាស្ត្រសង្គ្រាមពីមេដឹកនាំល្បីៗ និង ទស្សនវិជ្ជាពីអ្នកប្រាជ្ញល្បីៗរាប់មិនអស់។

៥) ការចម្លងពីគេ
ចិនបានជាប់ចំណាត់ថ្នាក់ទី១ រឿងចម្លងពីអ្នកដទៃនេះឯង។ បើលោកអ្នកគ្មានលទ្ធភាពទិញ iPhone 6 Pluse របស់ក្រុមហ៊ុន Apple ដែលលក់ក្នុងតម្លៃ ២ ៤០០ដុល្លារនៅក្នុងទីផ្សារចិននោះ លោកអ្នកអាចចំណាយត្រឹមតែ ២ ទៅ ៧៥ ដុល្លារប៉ុណ្ណោះលើ iPhone 6 Plus របស់ចិនមួយគ្រឿងដែលមានរូបរាងដូចគ្នាបេះបិទ។ នេះមិនទាន់រាប់បញ្ចូលការថតចម្លងសម្ភារៈផ្សេងៗទៀតដូចជា សម្ភារៈអគ្គិសនីជាដើម ដែលចិនអាចធ្វើបានដូចក្រុមហ៊ុនដើមតែម្តង លើកលែងតែគុណភាពតែប៉ុណ្ណោះ។

៦) សាងសង់អាគារដោយប្រើពេលខ្លី
នេះជាចំណាត់ថ្នាក់ផុតលេខមួយទៀតរបស់ចិនដែលគេបានទទួលស្គាល់ថា វិស្វករចិនអាចសាងសង់អគារផ្សេងៗ ដោយប្រើពេលខ្លីបំផុត និង មានលក្ខណៈទាក់ទាញទៀតផង។ គេនៅចាំបានថា កាលពីឆ្នាំមុន ក្រុមវិស្វករចិនបានសង់សណ្ឋាគារមួយដែលមានកម្ពស់ ៣០ ជាន់ស្ថិតនៅក្នុងខេត្ត Hunan ដោយប្រើពេលត្រឹមតែ ១៥ ថ្ងៃតែប៉ុណ្ណោះជាមួយតម្លៃនៃការចំណាយ ១៧ លានដុល្លារ។ ការសង់អគារយ៉ាងឆាប់រហ័សលឿនដូចផ្លេកបន្ទោរនេះ កំពុងក្លាយជាគោលដៅដ៏សំខាន់សម្រាប់រដ្ឋាភិបាលចិនដើម្បីអភិវឌ្ឍ សំណង់អគារក្នុងទីក្រុងដោយមិនប្រើពេលយូរឆ្នាំ និង មានគុណភាពស្របតាមស្តង់ដារអន្តរជាតិ។

៧) តែ
ប្រិយមិត្តពិតជាបានដឹងហើយថា ក្នុងជីវភាពរស់នៅប្រចាំថ្ងៃប្រជាជនចិនកម្រភ្លេចក្រេបរសជាតិតែ របស់ខ្លួនណាស់។ ហេតុដូច្នេះហើយ បានជាគេសង្កេតឃើញថា ដំណាំតែរបស់ចិនឈានមុខគេលើប្រទេសណាៗទាំងអស់។ ប្រជាជនចិនពេញនិយមផឹកតែណាស់ ដោយហេតុថា វាប្រៀបបានជាឱសថពិសេសមួយជួយព្យាបាលរោគាផ្សេងៗ បង្កើនទំនាក់ទំនង និង ជួយបន្ធូរអារម្មណ៍តានតឹង រួមទាំងភាពនឿយហត់របស់ពួកគេទៀតផងដែលបានក្លាយទៅជាទំនៀមទំលាប់ មិនអាចខ្វះបាន។

៨) ធ្វើដំណើរទៅកាន់តំបន់ខ្ពស់ៗ
បើក្រឡេកទៅកាន់ព្រំដែនភាគខាងត្បូងប្រទេសមានព្រំប្រទល់ជាប់នឹង ប្រទេសនេប៉ាល់ លោកអ្នកអាចធ្វើដំណើរមកកាន់ទីនេះដើម្បីឡើងភ្នំដ៏ខ្ពស់ ស្កឹមស្កៃ គឺភ្នំអឺរ័រេសដែលមានកម្ពស់ រហូតដល់ ៨ ៨៤៨ ម៉ែត្រដោយចំណាយពេលខ្លីបំផុត។ ប៉ុន្តែ បើចង់ទៅលេងកំពូលភ្នំ Tanggula នៅតំបន់ទីបេដែលមានកម្ពស់ ៥ គីឡូម៉ែត្រវិញនោះ លោកអ្នកអាចធ្វើដំណើរដោយរយៈពេលខ្លីតាមខ្សែរថភ្លើងខ្ពស់បំផុត Qinghai។ ក្រៅពីនេះ ចិននៅមានកន្លែងកម្សាន្តខ្ពស់ៗជាច្រើនទៀតដែលអាចនាំរថយន្ត រថភ្លើង អាកាសយានដ្ឋានទៅដល់កំពូលភ្នំតែម្តង ដូចជាអាកាសយានដ្ឋាន Daocheng Yading នៅ ខេត្ត Sichuan មានកម្ពស់ជាង ៤ គីឡូម៉ែត្រ និង នៅតំបន់ទីបេដែលមានកម្ពស់ជិត ៤,៥ គីឡូម៉ែត្រជាដើម។

៩) នំប៉ាវ
ងាកមកមើលអាហារពេញនិយមមួយទៀតដែលល្បីឈ្មោះក្នុងសង្គមចិនតាំង ពីយូរលង់ណាស់មកហើយ នោះគឺនំបាវ។ នៅពេលដែលលោកអ្នកចង់ពិសារអាហារមុខម្ហូបនៅក្នុងកម្មវិធីផ្សេងៗ បញ្ជីមុខម្ហូប ឬ អាហារមិនមានរំលងនំប៉ាវនោះឡើយ។ វាបានបង្ហាញពីភាពវិសេសវិសាលនៃអត្តសញ្ញាណរបស់ប្រជាជនចិន ជាពិសេសនៅពេលមានពិធីជួបជុំ ពិធីបុណ្យ ឬ ពិធីបុណ្យចូលឆ្នាំជាដើម ដែលតំណាងឲ្យភាពសុខក្សេមក្សាន្ត ក្តីសង្ឃឹម និង ភាពរុងរឿងរបស់ប្រជាជនខ្លួន។

១០) ការរៀបចំព្រឹត្តិការណ៍កីឡាអូឡាំពិក
ក្នុងនាមជាម្ចាស់ផ្ទះរៀបចំព្រឹត្តិការណ៍កីឡាអូឡាំពិកពិភពលោកកាល ពីឆ្នាំ ២០០៨ ព្រឹត្តិការណ៍នេះមិនបានធ្វើឲ្យប្រជាជនចិនភ្លេចនោះឡើយ ត្បិតអីវាត្រូវបានរៀបចំឡើងអធិកអធមធំជាងគេបំផុតជា ប្រវត្តិសាស្ត្រមិនធ្លាប់មាននៅលើពិភពលោក។ ការរៀបចំបំពាក់ភ្លើងពណ៌ សិល្បៈនៃការតុបតែងឆាក អ្នករបាំអូបារ៉ា រួមទាំងអ្នកសម្ដែងរាប់ពាន់នាក់ផ្គុំគ្នាបង្កើតបានជាទិដ្ឋភាព តែមួយដ៏ទាក់ទាញនៅលើពហុកីឡាដ្ឋាន បានបង្កើតទស្សនីយភាពដ៏អស្ចារ្យមិនអាចប្រៀបប្រដូចបាន។ ការរៀបចំកម្មវិធីនេះបានយ៉ាងល្អឥតខ្ចោះ និង បញ្ចប់ទៅប្រកបដោយភាពជោគជ័យ គឺជាតឹកតាងបញ្ជាក់ថា ចិនពិតជាយក្សទើបនឹងក្រោកពីដេកយូរឆ្នាំ កំពុងបង្ហាញអនុភាពរបស់ខ្លួនឲ្យពិភពលោកបានដឹងហើយនៅ ពេលបច្ចុប្បន្ននេះ៕

ប្រែសម្រួល៖ ខេវិន

ប្រភព៖ CNN

ជួបជាមួយកុមារាអាយុទើបតែ ៨ ឆ្នាំរកប្រាក់ចំណូលមួយឆ្នាំបាន ១,៣ លានដុល្លារពី YouTube

យ៉ាងណាមិញ មិត្តអ្នកអាននឹងភ្ញាក់ផ្អើលជាមួយកុមារាអាមេរិកម្នាក់ទៀតដែលមាន វ័យត្រឹមតែ ៨ ឆ្នាំមានគំនិតមិនធម្មតាចេះរកគន្លឹះជួយស្វែងរកលុយបាន ១,៣ លានដុល្លារក្នុងមួយឆ្នាំៗ ពីគេហទំព័រ YouTube។ តើកុមារាម្នាក់នេះជាអ្នកណា? អាចស្វែងរកប្រាក់ចំណូលដោយរបៀបណា?

កុមារាដែលប្រិយមិត្តចង់ដឹងនេះ មានឈ្មោះកាត់ថា Evan ជនជាតិអាមេរិក ដែលក្រុមគ្រួសាររបស់ខ្លួនចាត់ទុកថា ជាក្មេងដ៏ឆ្លាតវ័យម្នាក់ និង ចូលចិត្តធ្វើសកម្មភាពអ្វីៗប្លែក តែបាននាំមកនូវប្រាក់ចំណូលជូនដល់ឪពុកម្តាយរបស់របស់ខ្លួន ១,៣ លានដុល្លារក្នុងមួយឆ្នាំៗ។

តាមពិតទៅប្រាក់ដែលទទួលបាននេះកើតចេញពីគម្រោង និង សកម្មភាពសប្បាយៗថតជាវីដេអូ របស់ Evanជាមួយប្អូនស្រី ដូចជា សកម្មភាពលេងហ្គេម Angry Birds រួមទាំងសកម្មភាពប្លែកៗដ៏ទាក់ទាញជាច្រើនទៀតក្រោមការជ្រោមជ្រែង ពីឪពុកម្ដាយរបស់ខ្លួន។ វីដេអូរបស់ Evan ត្រូវបានយកទៅបង្ហោះលើគេហទំព័រ YouTube ដែលទូទាត់មកវិញនូវប្រាក់ចំណូលចំនួន ១,៣ លានដុល្លារនេះ។

តាមរយៈវីដេអូរបស់ Evan ដែលប្រិយមិត្តអាចចូលមើលនៅគេហទំព័រ YouTube គេបានរៀនសូត្រពីយុទ្ធសាស្ត្រជាច្រើនពីកុមារាម្នាក់នេះ។ ក្នុងបទសម្ភាសន៍មួយជាមួយសារព័ត៌មាន Newsweek ឪពុករបស់ Evan លោក Jaredបានលើកឡើងថា ការបង្ហោះវីដេអូនេះ មិនមែនចេះតែធ្វើទេ គឺត្រូវមានយុទ្ធសាស្ត្រច្បាស់លាស់ដូចអាជីវកម្មទូទៅដែរ។

«យើងមានក្រុមការងារផ្នែកលក់ជំនាញៗជាច្រើនសម្រាប់ផ្តល់ យុទ្ធសាស្ត្រធ្វើឲ្យវីដេអូទាំងនេះមើលទៅគួរឲ្យចាប់អារម្មណ៍ និង សហការជាមួយក្រុមហ៊ុននានាផ្សព្វផ្សាយពាណិជ្ជកម្មអមជាមួយវីដេអូ ទាំងនោះ។ ដូចអ្នកទាំងអស់គ្នាបានឃើញស្រាប់នៅលើវីដេអូ មាន Ads របស់ក្រុមហ៊ុនជាច្រើនដូចជា Google ដាក់នៅក្នុងវីដេអូទាំងនោះ ហើយប្រាក់ចំណូលដែលទទួលបានភាគច្រើនបានពីក្រុមហ៊ុនឧបត្ថម្ភ នេះឯង។ នេះជាប្រសាសន៍លោក Jared។

លោក Jared បានបន្តថា វីដេអូទាំងនេះមើលទៅហាក់ដូចជាសមញ្ញា តែការពិតវាត្រូវបានផលិតឡើងអស់ប្រាក់ច្រើនគួរសមដែរក្នុងវីដេអូ នីមួយៗ។ ប៉ុន្តែភាពច្នៃប្រឌិត និង ការសម្ដែងបានល្អរបស់ Evan បានធ្វើឲ្យវាកាន់តែទាក់ទាញក្លាយជាវីដេអូពេញនិយម មិនចេះរីងស្ងួតដែលអាចរកប្រាក់ចំណូលបានច្រើនគួរសម៕

សូមទស្សនាវីដេអូរបស់ Evan ខាងក្រោមនេះ!

ប្រែសម្រួល៖ ខេវិន
ប្រភព៖ Businessinsider

ចង់ធ្វើជាសហគ្រិនបើមិនយល់ដឹងច្រើន ចងចាំច្បាប់៣នេះក៏ប្រសើរដែរ!

សហគ្រិនថ្មីថ្មោង ឬ ម្ចាស់អាជីវកម្មទូទៅគួរតែចងចាំច្បាប់៣ សំខាន់ៗនេះនៅលើផ្លូវអាជីវកម្មរបស់លោកអ្នក ដែលផ្ដោតជាអាទិភាពទៅលើភាពជាអ្នកដឹកនាំ ការគិតឲ្យបានល្អិតល្អន់ និង មានស្មារតីពិតប្រាកដភាពជាសហគ្រិន។

១) មានការទំនួលខុសត្រូវខ្ពស់
នៅពេលដែលអ្នកក្លាយជាសហគ្រិន ការទទួលខុសត្រូវរបស់ត្រូវមានកម្រិតខ្ពស់បំផុតទោះបីជាត្រូវ បរាជ័យ ឬ ជោគជ័យយ៉ាងណាក៏ដោយ។ អ្នកត្រូវស្វែងយល់ពីអ្វីដែលជាតម្រូវការ និង ការចង់បានរបស់អតិថិជន កសាងទំនាក់ទំនងដ៏រឹងមាំទៅវិញទៅមកទាំងនៅក្នុង និង ក្រៅក្រុមហ៊ុន។ នេះទាមទារឲ្យអ្នកមានការអភិវឌ្ឍជាលំដាប់ក្នុងនាមជាអ្នកដឹកនាំ នាសតវត្សទី២១នេះ ដើម្បីធ្វើជាការពឹងអាស្រ័យពីសំណាក់ក្រុមការងារគ្រប់ ជាន់ថ្នាក់ទាំងអ្នកចូលធ្វើការថ្មី អ្នកធ្វើការចាស់ និង អ្នកដែលចាកចេញទៅ។

...ហេតុផលចំនួន៧ បញ្ជាក់ថា ហេតុអ្វីបានជាលោកអ្នកត្រូវចាប់ផ្តើមធ្វើអាជីវកម្មនៅឆ្នាំ ២០១៥នេះ?...

២) ដាក់វិន័យឲ្យខ្លួនឯងជាកំហិត
ការសិក្សារៀនសូត្រមិនចេះចប់ គឺជាអ្វីដែលសហគ្រិនគ្រប់រូបត្រូវមាន ទោះបីជាស្ថិតនៅក្នុងស្ថានភាពបែបណាក៏ដោយ។ គោរពពេលវេលា អតិថិជន បុគ្គលិក រួមទាំងការរៀបចំអត្តចរិតឲ្យសមសួនជាសហគ្រិន គឺជាករណីយកិច្ចដ៏ចាំបាច់របស់អ្នក។ ក្រៅពីនេះ អ្នកត្រូវចងចាំថា អ្នកត្រូវធ្វើឲ្យអាជីវកម្មរបស់អ្នកទៅជាកន្លែងមួយដ៏សំបូរបែប និង ជាប្រភពធនធានផលិតផល ឬ សេវាកម្មដែលអតិថិជនអាចរកឃើញដោយមិនចេះនឿយណាយ។

៣) មានមហិច្ឆតា
បើគ្មានមហិច្ឆតាទេ ចូរកុំធ្វើអាជីវកម្មល្អជាង តែបើចង់ធ្វើហើយនោះ ដាច់ខាតត្រូវមានមហិច្ឆតាថា អ្នកចង់ក្លាយជាសហគ្រិនបែបណានៅពេលអនាគត? ដឹកនាំអាជីវកម្មទៅតាមផ្លូវណា? ចង់សម្រេចនៅពេលណា? យ៉ាងណាមិញ អ្នកអាចជួបបញ្ហាច្រើននៅពេលដែលអ្នកបានឈានជើងចូលក្នុងសមរភូមិ អាជីវកម្មដំបូង។ ប៉ុន្តែ កុំបោះបង់មហិច្ឆតារបស់អ្នក ហើយត្រូវជឿជាក់ថា ចក្ខុវិស័យ និង គោលដៅអាជីវកម្មរបស់អ្នកនឹងអាចក្លាយជាការពិតនៅថ្ងៃខាងមុខបាន៕

ប្រែសម្រួល៖ ខេវិន

ប្រភព៖ Entrepreneur

រឿង Facebook ចង់ប្រជែង Youtube កាន់ឡើងកម្ដៅបន្ទាន់ពី FB ទិញក្រុមហ៊ុនថ្មីមួយបង្កើនគុណភាពវីដេអូ

យោងតាមបណ្ដាញព័ត៌មានរ៉យទ័រថ្ងៃនេះឱ្យដឹងថា ក្រុមហ៊ុន Facebook Inc បានទិញយកក្រុមហ៊ុនឯកទេសខាងវីដេអូ QuickFire Networks ដើម្បីសម្រួចអភិវឌ្ឍមាតិកាវីដេអូឱ្យកាន់តែខ្លាំងថែមទៀតនៅលើ បណ្ដាញសង្គមរបស់ខ្លួន។ យ៉ាងណា សម្រាប់ចំនួនទឹកប្រាក់នៃកិច្ចព្រមព្រៀងទិញលក់ រវាងក្រុមហ៊ុនទាំងពីរមិនត្រូវបានបញ្ជាក់។ តាមរយៈបច្ចេកវិទ្យារបស់ QuickFire នឹងជួយបង្កើនគុណភាពវីដេអូរបស់ Facebook ជាមួយ bandwidth ទាបប៉ុណ្ណោះ។

នាយកប្រតិបត្តិរបស់ QuickFire លោក Craig Y. Leeបានប្រកាសការទិញលក់នេះនៅលើគេហទំព័ររបស់ក្រុមហ៊ុន ដោយសរសេរថា QuickFire Networkd ត្រូវបានបង្កើតដំបូងឡើយគឺមានឯកទេសផ្នែកហេដ្ឋារចនាសម្ព័ន្ធបណ្ដាញ (Network infrastructure) មិនមែនជំនាញផ្នែកវីដេអូអនឡាញនោះឡើយ។ ដោយសារក្រុមហ៊ុនបានអភិវឌ្ឍបច្ចេកវិទ្យាកាត់បន្ថយ bandwidth ឱ្យនៅទាបដើម្បីអាចទស្សនាវីដេអូអនឡាញដោយមិនមានប៉ះពាល់គុណភាព វីដេអូ។

កិច្ចព្រមព្រៀងទិញក្រុមហ៊ុន QuickFire គឺធ្វើឡើងរយៈពេល ១ថ្ងៃ ក្រោយពី Facebook បានបញ្ជាក់នៅលើទំព័រ blog របស់ខ្លួនថា គិតចាប់ពីខែមិថុនា ឆ្នាំ២០១៤ មក វីដេអូ Facebook មានអ្នកចុចមើលយ៉ាងច្រើនរហូតជាង ១ពាន់លានដងក្នុងមួយថ្ងៃៗ។ ដូច្នេះ កិច្ចព្រមព្រៀង Facebook សម្រេចទិញយកក្រុមហ៊ុនជំនាញវីដេអូនេះ គឺដើម្បីអភិវឌ្ឍគុណភាពវីដេអូ ផ្ដល់បទពិសោធន៍ខ្ពស់ដល់អ្នកទស្សនាវីដេអូ Facebook ជាមួយកម្រិតគុណភាពច្បាស់ល្អ។

Facebook បានគូសបញ្ជាក់ថា ប្រជាជនអាមេរិកដែលប្រើ Facebook ប្រមាណ ៥០% គិតជាមធ្យមគឺបើកមើលវីដេអូម្ដង ជារៀងរាល់ថ្ងៃ ហើយក្នុងរយៈពេលមួយឆ្នាំ វីដេអូ Facebook បានកើនឡើង ៧៥% ទូទាំងពិភពលោក និងកើនឡើង ៩៤% នៅសហរដ្ឋអាមេរិក។

តាមរយៈការទទួលបាន QuickFire Network នឹងកាន់តែពង្រឹងសក្ដានុពលរបស់ Facebook ផ្នែកវីដេអូ។ គួររំលឹកថា កាលពីចុងខែធ្នូឆ្នាំ២០១៤ កន្លងទៅ ក្រុមហ៊ុន Facebook បានចាប់ផ្ដើមធ្វើតេស្តដាក់ពាណិជ្ជកម្ម (ads) នៅលើវីដេអូរបស់ខ្លួនហើយ។ ពាណិជ្ជកម្មដែលក្រុមហ៊ុនបណ្ដាញសង្គមយក្សនេះកំពុងសាកល្បង គឺមានបិទភ្ជាប់នៅលើវីដេអូ ដែលនឹងបង្ហាញចេញមក ក្រោយពេលអ្នកវីដេអូលេងចប់ (បង្ហាញនៅចុងបញ្ចប់នៃវីដេអូ) ពោលគឺមិនបង្ហាញក្នុងពេលកំពុងទស្សនាដូចវីដេអូ Youtube នោះទេ។

រង់ចាំមើលថាតើ Facebook ពិតជាមានចំណូលចិត្តបង្កើនអាជីវកម្មថ្មីដោយប្រើប្រាស់វីដេអូដែល កំពុងមានមនុស្សរាប់លានអ្នកចុចមើលរាប់ពាន់ដងក្នុងមួយថ្ងៃៗឬ ទេ?

ប្រែសម្រួល៖ លី ឈៀន

ប្រភព៖ reuters, businessinsider

ដៃហ្គេមកាច់បត់បានដូចរឿង Transformer ស្រួលលេងហ្គេមលើទូរស័ព្ទ Android

មិនមែនមានតែផលិតផលទូរស័ព្ទ និងកុំព្យូទ័រដែលត្រូវបានសំញែងនៅក្នុងព្រឹត្តិការណ៍ CES 2015 ប៉ុណ្ណោះទេ តែក៏នៅមានប្រភេទផលិតផលអេឡិចត្រូនិកល្អពិសេសជាច្រើនទៀត ជាក់ស្ដែងដៃបញ្ជាសម្រាប់លេងហ្គេមលើស្មាតហ្វូន Android ជាដើម។ ដៃហ្គេមដែលមានឈ្មោះ L.Y.N.X.9 gaming controller ពិសេសនេះគឺជាផលិតផលរបស់ក្រុមហ៊ុនផលិតឧបករណ៍បែបកម្សាន្ត និងពាក់ព័ន្ធហ្គេម Mad Catz ដែលមានស្នាក់ការនៅអាមេរិក។

លក្ខណៈពិសេសនៅលើ L.Y.N.X.9 នេះគឺ នឹងផ្ដល់បទពិសោធន៍ថ្មី ផ្ដល់ភាពកាន់តែងាយស្រួលសម្រាប់លោកអ្នកដែលចូលចិត្តលេងហ្គេមលើ ស្មាតហ្វូន។ ឧបករណ៍នេះ មានរូបរាងស្រដៀងមនុស្សយន្ត Transformer នៅក្នុងរឿងហូលីវូដអីចឹង ដែលអាចកាច់បត់រូបរាងបាន។ ដៃហ្គេមនេះអាចភ្ជាប់ជាមួយស្មាតហ្វូនដំណើរការដោយប្រព័ន្ធ ប្រតិបត្តិការ Android ដើម្បីងាយស្រួលបញ្ជា។ កាន់តែពិសេស ផលិតផលថ្មីរបស់ក្រុមហ៊ុនអាមេរិក Mad Catz នេះថែមទាំងអាចប្រើជាមួយក្ដារចុចអក្សរប្រភេទ QWERTY keypad ដើម្បីកាន់តែងាយស្រួលវាយពាក្យបញ្ជានៅលើហ្គេម។

ដៃហ្គេម L.Y.N.X.9 មិនត្រឹមតែអាចលេងបានជាមួយហ្គេមនៅលើស្មាតហ្វូន Android តែក៏ប្រើបានជាមួយកុំព្យូទ័រ Windows PC ផងដែរ ដែលភ្ជាប់តាម Bluetooth ហើយសាកថ្មឡើងវិញបានតាមរន្ធ USB និងកាន់ថ្មបាន ២០ម៉ោង។ ដៃហ្គេមអាចកាច់បត់បាននេះ ក៏មានរន្ធតំណភ្ជាប់ផ្សេងៗដូចជា រន្ធ HDMI និង MHL adaptor សម្រាប់ភ្ជាប់ទៅកាន់ទូរទស្សន៍បាន។ តម្លៃដៃហ្គេមពិសេសនេះ គឺ ២៩៩ដុល្លារអាមេរិក៕

ប្រែសម្រួល៖ លី ឈៀន

ប្រភព៖ androidcentral

Subscribe to: Comments ( Atom )

The Khmer News Online

ព័ត៌មានសេដ្ឋកិច្ច

ព័ត៌មានពិភពលោក

a

ព័ត៌មានសេដ្ឋកិច្ច

ព័ត៌មានពិភពលោក

Category 3

Category 4

Latest Updates